సిప్రాలి - శ్రీశ్రీ - సిగరెట్టిస్తా, శతకం రాసిస్తావా?

"నీకొక సిగరెట్టిస్తా,
నాకొక శతకమ్ము రాసి నయముగ నిమ్మా,
త్రైకాల్య స్థాయిగ నీ
శ్రీ కావ్యము వరలునోయి సిరిసిరిభాయీ!

ఒక సంపాదకుడు శ్రీశ్రీ కలలో కనబడి పద్యాలు రాయమని అడిగాడని ఇక్కడ ఊహ। ఇంతకీ ఆ వ్యక్తి చక్రపాణి - అసలు పేరు ఆలూరి వెంకటసుబ్బారావుగారు (1903 - 1975) ఆంధ్రజ్యోతి (మాసపత్రిక) సంపాదకుడు। యువపత్రిక (పాతది, కొత్తది కూడా) ప్రచురణ సంస్థ వ్యవస్థాపకుడు। చలం, కొడవటిగంటి కుటుంబరావు మొదలైన వారి రచనలను ప్రచురించారు। బడదీది, పల్లీయులు, దేవదాసు వగయిరా శరత్ నవలలను అనువదించి ప్రచురించారు। 'చందమామ' వ్యవస్థాపకులు - విజయ పిక్చర్సు అధినేతలయిన నాగిరెడ్డి, చక్రపాణిల్లో ఒకరు। "మాయాబజార్" లాంటి మరపురాని తెలుగు సినిమాలని నిర్మించిన సంస్థ విజయ పిక్చర్సు।